بالنسبة للمخارق
زوز كيسان سميد ارطب عليهم كاس فارينة و كاس سمن و مغرفة خميرة خبز و مغرفة صغيرة ملح و نخلطوهم بالماء دافى شوية و بصوابعنا نخلطو العجينة و نخلوها ترتاح 15 دقيقة و بعد نشكلوها في شكل صوابع و نعملو فيها ثقب هاذوكم بذيل المغرفة العود والا اي وسيلة أخرى و بعد ما نشكلوهم الكل نخلوهم يرتاحو 15 دقيقة أخرى و نسخنو الزيت و كي نقليوهم نحاولو نخليويها تحمار بالقدا على شرط انو النار ما تكونش قوية بش ما تحمارش فيسع مالبرا و تقعد نية في الوسط
بالنسبة للزلابيا
زوز كيسان فارينة عليهم مغرفة خميرة خبز و مغرفة صغيرة ملح و مغرفة زعفران مرحي و الا ملون اصفر و الا كركم و مغرفة كبيرة زيت و نخلطوهم بالخلاط و احنا نصبو في الماء الدافى بشوية بشوية لين يولي قوام العجينة كيف الكراب و نخلوها ترتاح 30 دقيقة و نسخنو الزيت و نحركو العجينة متاعنا بمغرفة بش يخرج منها الهوى ناخذو قمع نسكروه بصبعنا و نحطو فيه شوية من الخليط هذاكا و نجيو فوق الزيت و نحيو صبعنا على الفتحة متع القمع و نشكلو كعبة الزلابيا متاعنا انا شخصيا هاذي طريقتي لكن الي صعيبة عليه يستعمل في بلاصة القمع دبوزة متع citrol والا متع katchap
بالنسبة للشحور
كيلو سكر و نصف لتر ماء و نصف مغرفة صغير" شب مرحي" و يتحركو مع بعضهم فوق النار و كيف يذوب السكر يبدأ الشحور يغلي نخلوه من 10 الى 15 دقيقة و نتحصلو علا الشحور متاعنا
بالنسبة للشحور بالطريقة هاذي يكون بنين برشا و كي نحطوه و نسكرو عليه يقعد صالح حتى لمدة عام كامل
و الي ما يحبش الطريقة هاذي يستعمل نفس المقادير للماء و السكر و بعد 10 دقائق نعصرو فيه شطر كعبة قارص و نحطوها فيه و يكمل يطيب 5 دقايق
ليست هناك تعليقات:
إرسال تعليق